ဖဲလါယနူၤအါရံၤ ၁၁ သီ, ၂၀၂၅ နံၣ်အနံၤန့ၣ်, သီခါခံပါလၢအကွၢ်ထွဲဝဲသီခါဖၠၣ် ဖဲက--- သဝီ, မဲးပြံးခံကရူၢ်, ဘုသိၣ်ကီၢ်ဆၣ်, မုၢ်တြီၢ်ကီၢ်ရ့ၣ်အပူၤအံၤ, ဘၣ်ဒိဝဲဒီးမ့ၣ်ပိၢ်လၢအဘၣ်တၢ်ဒိးလီၤဃၥ်အီၤလၢ ကညီဒီကလုၥ်စၢဖှိၣ်ကရၢ (KNU) ဖဲလၢၢ်ကွဲကျဲပူၤ လၢအအိၣ်သူၣ်လီၤအသးဖဲမဲးပြံးခံကရူၢ်, ဘုသိၣ်ကီၢ်ဆၣ်, ဒီးဟ--- သဝီ, လ့ဖိထၣ်ကရူၢ်, ဒွဲၣ်လိကီၢ်ဆၣ်အဘၢၣ်စၢၤန့ၣ်လီၤ. သီခါအကျါတပါမ့ၢ်ဝဲအူရ--- ဒီးသးနံၣ်အိၣ်ဝဲ (၃၀) နံၣ်တပါအံၤ အိၣ်ဆိးဝဲဖဲန---သဝီ, ထံသဒီၣ်ထၣ်ကရူၢ်, ဘုသိၣ်ကီၢ်ဆၣ်အ ပူၤန့ၣ်လီၤ. ဒီးသီခါအဝဲတပါအမံၤမ့ၢ်အူအ--- သးနံၣ်အိၣ် ဝဲ (၂၅) နံၣ်အံၤအိၣ်ဆိးဝဲလၢ ဃ---သဝီ, ဖှၣ်ဂီၤကရူၢ်, ဖၣ်အၣ် ကီၢ်ဆၣ်, ဒူသထူၣ်ကီၢ်ရ့ၣ်အပူၤန့ၣ်လီၤ. အူရ--- န့ၣ်ကဲထီၣ်သီခါအိၣ်လံအနံၣ်တဆံ ဒီးမ့မ့ၢ်အူအ--- န့ၣ်ကဲထီၣ်သီခါအိၣ်ဒ်ဒၣ် တနံၣ်န့ၣ်လီၤ. သီခါခံပါအံၤ လဲၤမၤဝဲတၢ်ဘူၣ်ဖဲ က--- သဝီန့ၣ်လီၤ. အူရ ---အံၤဘၣ်သံကွံၣ်ဝဲလၢ မ့ၣ်ပိၢ်အတၢ်ပိၢ်ဖးထီၣ်အံၤ အဃိန့ၣ်လီၤ.  မ့မ့ၢ်အူအ---န့ၣ် ဘၣ်တၢ်လဲၤဆှၢအီၤဆူဝ့ၢ်တကူၣ်တၢ်ဆါဟံၣ် လၢအဘၣ်တၢ်တီခိၣ်ရိၢ်မဲအီၤလၢ ထံကီၢ်တၢ်ပၢ တၢ်ပြးကီၢ်ကးကရၢ (SAC) န့ၣ်လီၤ. ဖဲလၢအူအ--- ဘၣ်တၢ်လဲၤဆှၢအီၤဆူဝ့ၢ်တကူၣ်တၢ်ဆါဟံၣ်ဝံၤအလီၢ်ခံန့ၣ်, KHRG တဒိးန့ၢ်ဘၣ်တၢ်ဂ့ၢ်တၢ်ကျိၤဘၣ်ဃးဒီးအီၤနီတမံၤလၢၤဘၣ်န့ၣ်လီၤ.

တချုးလၢတၢ်ကဲထီၣ်သးဒံးဘၣ်န့ၣ်, လီၢ်ကဝီၤ KNU ဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) အပှၤ, သဝီခိၣ်နၢ်, ဒီးတ--- ကရူၢ်ဘံၣ်ဘၢခိၣ်နၢ်သ့ၣ်တဖၣ်ဟ့ၣ်ပလီၢ်ဝဲသဝီဖိသ့ၣ်တဖၣ်န့ၣ်လီၤ. အဝဲသ့ၣ်ဟ့ၣ်ပလီၢ်ဆိပာ်ဝဲ (၁၅) သီ တချုးအဝဲ သ့ၣ်လဲၤဒိးလီၤမ့ၣ်ပိၢ်ဖဲလၢၢ်ကွဲကျဲမုၢ်ဒီးဟ--- သဝီခိၣ်ဃၢၤပၣ်ဃုာ်စ့ၢ်ကီးဒီးကျဲန့ၣ်လီၤ. သဝီဖိသ့ၣ်တဖၣ်ဘၣ်တၢ်ဟ့ၣ်ကူၣ်အီၤ လၢကဟးထီၣ်ဟးလီၤက့ၤလၢကျဲအဂၤန့ၣ်လီၤ. ဖဲအဝဲသ့ၣ်တၢ်ဟ့ၣ်ပလီၢ်အီၤဝံၤအလီၢ်ခံ KNU လီၢ်ကဝီၤခိၣ်နၢ်သ့ၣ်တဖၣ် ကဆဲးဒိးလီၤဒံးဝဲမ့ၣ်ပိၢ်ဖဲတၢ်လီၢ်လၢအဘူးဒီး ဟ--- သဝီဒီးကျဲလၢမုၢ်သ့ၣ်တဖၣ်န့ၣ်လီၤ.

စးထီၣ် KNU လီၢ်ကဝီၤခိၣ်နၢ်သ့ၣ်တဖၣ်ဟ့ၣ်ပလီၢ်ဒူသဝီဖိတဖၣ်ဝံၤအလီၢ်ခံန့ၣ် အဝဲသ့ၣ်တလဲၤလၢၤကျဲဖဲန့ၣ်နီတဘျီလၢၤဘၣ်. ဒ်လဲၣ်ဂ့ၤဂ့ၤ တၢ်နၥ်ဝဲလၢကျဲတဘိအံၤတၢ်ဂ့ၢ်ကီလၢကမၤတံၥ်တၥ်အီၤလၢကလဲၤဆူကမးမိၢ်ဝ့ၢ်အံၤတအိၣ်ဘၣ်အဃိ, သီခါခံပါ အံၤဟးထီၣ်ဝဲဒၣ်လၢက--- သဝီ, ဒီးလဲၤဝဲဆူလၢၢ်ကွဲအကျဲန့ၣ်လီၤ. အဝဲသ့ၣ်လဲတ့ၢ်လံဝဲကျဲလၢတၢ်တြီတံၥ်ဃၥ်အီၤတ ဘိအံၤခံဘျီတချုးလၢတၢ်ဒိးလီၤမ့ၣ်ပိၢ်ဒံးဘၣ်န့ၣ်လီၤ. ဖဲလၢအဝဲသ့ၣ်ကဟးထီၣ်တဘျီအံၤန့ၣ်, က---သဝီဖိတဲအီၤလၢတဘၣ် လဲၤကျဲအဝဲန့ၣ်ဘၣ်, ခီဖျိတၢ်ဒိးလီၤမ့ၣ်ပိၢ်ဖဲတၢ်လီၢ်ဝဲန့ၣ်လီၤ. သီခါခံပါန့ၣ်စံးဆၢဝဲသဝီဖိလၢတဘၣ်တၢ်နီတမံၤဘၣ်ဒီးအဝဲသ့ၣ် လဲၤဝဲကျဲတဘိန့ၣ်လီၤ. တနံၤဃီ ဖဲလါယနူၤအါရံၤ ၁၁ သီ, ၂၀၂၅ နံၣ်အနံၤန့ၣ် အဝဲသ့ၣ်လဲၤဝဲအဃိ ဘၣ်ဒိဒီးဘၣ်သံကွံာ်ဝဲ လၢမ့ၣ်ပိၢ်န့ၣ်လီၤ.  

(ဒ် KNU တ--- ကရူၢ်ဘံၣ်ဘၢခိၣ်ပာ်ဖျါထီၣ်ဝဲဆူ KHRG အအိၣ်အသိး) တၢ်တနံၤန့ၣ် KNU လီၢ်ကဝီၤကရူၢ်ဘံၣ်ဘၢ ပှၤဘၣ်မူဘၣ်ဒါတဖၣ် ဒိးလီၤဃာ်ဝဲမ့ၣ်ပိၢ်ဒီးတဒုးသ့ၣ်ညါသဝီဖိလၢၤဘၣ်. အဝဲသ့ၣ်ဆိကမိၣ်ဝဲလၢတမ့ၢ်တၢ်လိၣ်နီၢ်နီၢ်လၢ ကဘၣ်ဟ့ၣ်ပလီၢ်သဝီဖိအသီကဒီးတဘျီလၢၤဘၣ် မ့ၢ်လၢအဝဲသ့ၣ်ဟ့ၣ်ပလီၢ်ဆိဃၥ်ပာ်တ့ၢ်လံဝဲ (၁၅) သီ တချုးတၢ်ဒိးလီၤ မ့ၣ်ပိၢ်ဒံးဘၣ်န့ၣ်လီၤ. ဒ်တၢ်ပာ်ဖျါထီၣ်ဝဲ အသိး, KNU လီၢ်ကဝီၤကရူၢ်ဘံၣ်ဘၢပှၤဘၣ်မူဘၣ်ဒါတဖၣ်ဒိးလီၤဝဲ မ့ၣ်ပိၢ်ဒ်သိး ကဒီသဒၢလီၤဝဲ နီၢ်ကစၢ်အသးဒီးထံဖိကီၢ်ဖိကမျၢၢ်ဒ်သိး SAC သုးဖိတဖၣ်ဟဲနုၣ်လီၤသုတန့ၢ်အဂီၢ်, ခီဖျိလၢမဲးပြံးခံကရူၢ် တၢ်လီၢ်အံၤ အိၣ်သူၣ်လီၤအသးဘူးဒီးကမးမိၢ်ဝ့ၢ်တၢ်လီၢ်ဖဲလၢ SAC သုးဖိတဖၣ်အိၣ်အလီၢ်န့ၣ်လီၤ.

ဖဲလါယနူၤအါရံၤ ၂၀၂၅ နံၣ်ဝံၤအလီၢ်ခံန့ၣ်, တၢ်ဖ့ၣ်ဆၢလၢ KNLA သုးပာ်ဖှိၣ်ဒီး SAC သုးဖိတဖၣ်အါထီၣ်ဝဲလၢတၢ်လီၢ်ဖဲန့ၣ် အဃိတၢ်အိၣ်သးသ့ၣ်တဖၣ်ဒုးကဲထီၣ်ဝဲတၢ်ကီတၢ်ခဲလၢတၢ်လဲၤတၢ်က့ၤ, တၢ်အိၣ်တၢ်ဆိး ဒီးတၢ်ဖံးအီၢ်မၤအီၣ်လၢသဝီဖိသ့ၣ် တဖၣ်အဂီၢ်အါန့ၢ်ဒ်လၢအပူၤကွံာ်န့ၣ်လီၤ.

ဘၣ်ထွဲဒီးဟီၣ်လာ်မ့ၣ်ပိၢ်အိၣ်တၢ်အလီၢ်န့ၣ်တၢ်တမၤပနီၣ်ဃာ်အီၤလၢတၢ်နီတမံၤဘၣ်. အိၣ်ဒၣ်ထဲတၢ်ဟ့ၣ်ပလီၢ်ဝဲသဝီဖိသ့ၣ်တ ဖၣ်လၢတၢ်လီၢ်လၢမ့ၣ်ပိၢ်အိၣ်အလီၢ်န့ၣ်လီၤ. လၢန့ၣ်အမဲာ်ညါသဝီဖိသ့ၣ်တဖၣ်တဒိးန့ၢ်ဘၣ်ဟီၣ်လာ်မ့ၣ်ပိၢ်တၢ်လီၤဘၣ်ယိၣ်တၢ် သိၣ်လိနီတဘျီဘၣ်န့ၣ်လီၤ.