လါအီးကထိဘၢၣ် ၂၀၂၃ နံၣ် - ဟီၣ်လာ်မ့ၣ်ပိၢ် ပိၢ်ဖးထီၣ် (၄) ဖျၢၣ် ဖဲယ--- သဝီ, ပီချိဟီၣ်ကဝီၤ

     လါအီးကထိဘၢၣ် ၂၄ သီ, ၂၀၂၃ နံၣ် - ဟီၣ်လာ်မ့ၣ်ပိၢ် ပိၢ်ဖးထီၣ် (၂) ဖျၢၣ်

ဖဲလါအီးကထိဘၢၣ် ၂၄ သီ, ၂၀၂၃ နံၣ်န့ၣ်, သဝီဖိလၢအမံၤမ့ၢ် အူဘ--- (တသ့ၣ်ညါသးနံၣ်) လၢအအိၣ်ဖဲ ယ--- သဝီ, ပီချိ ဟီၣ်ကဝီၤ, ကစၢၢ်ဒိၣ်ကီၢ်ဆၣ်, ဘျံး-ဒဝဲၢ်ကီၢ်ရ့ၣ်တဂၤယီၢ်ဘၣ်ဝဲဟီၣ်လာ်မ့ၣ်ပိၢ်တဖျၢၣ်ဖဲအဝဲလဲၤမၤတၢ်လၢအကျိးပူၤဝံၤဟဲက့ၤ လၢဟံၣ်အဆၢကတီၢ်န့ၣ်လီၤ. ဒီးဟီၣ်လာ်မ့ၣ်ပိၢ်ဝဲအံၤမ့ၢ်သုးဖီၣ်စုကဝဲၤဖဲလဲၣ်တဖုဒိးလီၤအီၤလဲၣ်န့ၣ်တၢ်တသ့ၣ်ညါထွဲစ့ၢ်ကီး ဘၣ်. သဝီဖိ (အူဘ---) တဂၤအံၤမ့ၢ်ပှၤမၤအီၣ်မုၢ်ဆ့ၣ်မုၢ်ဂီၤဖိအိၣ်ဆိးဒီးအမါထဲခံဂၤဧိၤန့ၣ်လီၤ. မ့ၢ်လၢအယီၢ်ဘၣ်ဟီၣ်လာ် မ့ၣ်ပိၢ်အံၤအဃိအခီၣ်တူာ်ကွံာ်န့ၣ်လီၤ. ဖဲလၢအဘၣ်ဒိဆၢကတီၢ်အဝဲကိးစိအမါဒီးအမါကိးဃ့က့ၤတၢ်မၤစၢၤန့ၣ်လီၤ. သဝီဖိအ ဂၤသ့ၣ်တဖၣ်ဟဲဝဲဆူတၢ်ကဲထီၣ်သးအလီၢ်ဒီးက့ၤယိးက့ၤအီၤဆူယ--- သဝီပူၤန့ၣ်လီၤ. ဖဲလၢသဝီဖိက့ၤယိးအီၤလၢကျဲအဆၢ ကတီၢ်ဟီၣ်လာ်မ့ၣ်ပိၢ်ပိၢ်ဖးထီၣ်ကဒီးလၢအဝဲသ့ၣ်လီၢ်ခံတဖျၢၣ်ဘၣ်ဆၣ်တၢ်ဘၣ်ဒိဘၣ်ထံးတအိၣ်ဘၣ်. သဝီဖိသ့ၣ်တဖၣ်ဆိ ကမိၣ်ဝဲလၢကမ့ၢ်ထွံၣ်ယီၢ်ဘၣ် မ့တမ့ၢ် သ့ၣ်ဒ့လီၤတဲာ်ဘၣ်ဟီၣ်လာ်မ့ၣ်ပိၢ်အံၤအဃိပိၢ်ဖးထီၣ်ဝဲဒၣ်န့ၣ်လီၤ. ခီဖျိလၢဟီၣ်လာ် မ့ၣ်ပိၢ်တဖျၢၣ်အံၤပိၢ်ဖးထီၣ်အဆၢကတီၢ်အဝဲသ့ၣ်တလၢကွံာ်ဟီၣ်လာ်မ့ၣ်ပိၢ်အံၤလံအဃိန့ၣ်လီၤ. ဟီၣ်လာ်မ့ၣ်ပိၢ်အံၤဘၣ်တၢ် ဒိးလီၤပာ်အီၤလၢသုးဖီၣ်စုကဝဲၤတဖၣ်ဘၣ်ဆၣ်မ့ၢ်သုးဖီၣ်စုကဝဲၤဖဲလဲၣ်တဖုဒိးလီၤပာ်ဝဲလဲၣ်န့ၣ်သဝီဖိသ့ၣ်တဖၣ်တသ့ၣ်ညါ လီၤတံၢ်ဝဲဘၣ်. မ့ၢ်လၢသုးဖီၣ်စုကဝဲၤလၢအကရူၢ်လီၤဆီလိာ်သးတဖၣ်ဟူးဂဲၤလၢဟီၣ်ကဝီၤအံၤအပူၤအဃိန့ၣ်လီၤ.

ပှၤတူၢ်ဘၣ်ဟီၣ်လာ်မ့ၣ်ပိၢ် (အူဘ---) တဂၤအံၤ ဘၣ်တၢ်လဲၤဆှၢအီၤဆူ ရ--- တၢ်ဆါဟံၣ် (လၢ အဘၣ်တၢ်တီခိၣ်ရိၣ်မဲအီၤလၢ SAC) တဖျၢၣ်, လၢအအိၣ်သူၣ်လီၤအသးဖဲ (ဝ့ၢ်တၢ်အဲၣ် (မၠ့ၣ်တၤ) ဝ့ၢ်လၢအအိၣ်ဖဲကစၢၢ်ဒိၣ်ကီၢ်ဆၣ် ဒီး လၢၢ်ဒိၣ်စိကီၢ်ဆၣ် အဘၢၣ်စၢၤ န့ၣ်လီၤ.  ဝံၤအလီၢ် ခံ မ့ၢ်လၢ ရ--- တၢ်ဆါဟံၣ်န့ၣ်တၢ်ကူစါယါဘျါပီးလီတလၢပှဲၤဘၣ်အဃိလီၢ်ကဝီၤသဝီဖိ သ့ၣ်တဖၣ်လဲၤဆှၢက့ၤအီၤဆူတၢ်ဆါဟံၣ် (လၢအဘၣ်တၢ်တီခိၣ်ရိၣ်မဲအီၤ လၢ SAC) လၢအအိၣ်ဖဲဒဝဲၢ်ဝ့ၢ်လၢကဒိးကူစါယါဘျါ သးအဂီၢ်န့ၣ်လီၤ.

ဖဲသဝီဖိသ့ၣ်တဖၣ်လဲၤဆှၢသဝီဖိလၢအဘၣ်ဒိအူဘ--- တဂၤအံၤလၢတၢ်ဆါဟံၣ်ဝံၤဟဲက့ၤလၢကျဲအဆၢကတီၢ် ကီၢ်သူလ့ၤသုး မုၢ်ဒိၣ် (KTLA) ခးအဝဲသ့ၣ်ဒီးကျိဖဲအဝဲသ့ၣ်ဟဲက့ၤတုၤဖဲ လ--- သဝီ, ပီချိဟီၣ်ကဝီၤ, အခါန့ၣ်လီၤ. KTLA ခးသဝီဖိသ့ၣ်တ ဖၣ်အံၤဒီးကျိမ့ၢ်လၢအဝဲသ့ၣ်နီ KNU သိလ့ၣ်အဃိန့ၣ်လီၤ. တၢ်ကဲထီၣ်သးဘျီဝဲအံၤသဝီဖိလၢတၢ်တသ့ၣ်ညါအမံၤဘၣ်တဂၤ ဘၣ်ဒိဒီးကျိချံဖဲအယီၢ်ဒ့န့ၣ်လီၤ.

လါအီးကထိဘၢၣ် ၂၅ သီ, ဒီး ၂၆ သီ, ၂၀၂၃ နံၣ်

ဖဲလါအီးကထိဘၢၣ် ၂၅ သီ, ၂၀၂၃ နံၣ်န့ၣ်, သဝီဖိလၢအမံၤမ့ၢ် စီၤအ---, သးနံၣ် (၄၀) နံၣ်လၢအအိၣ်ဖဲ ယ--- သဝီတဂၤ လၢတၢ်တပာ်သူၣ်ပာ်သးအပူၤယီၢ်ဘၣ်ဝဲဟီၣ်လာ်မ့ၣ်ပိၢ်တဖျၢၣ်လၢအဘၣ်တၢ်ဒိးလီၤပာ်အီၤဖဲကျဲပူၤ (ကျဲလၢအအိၣ်ဖဲ ယ--- သဝီချၢ, လၢအဘၣ်တၢ်သူအီၤတၢ်လဲၤလ့ၣ်လိၤလၢတၢ်ဖံးအီၣ်မၤအီၣ်အလီၢ်န့ၣ်လီၤ.) ဖဲအဝဲလဲၤမၤတၢ်အဖၢမုၢ်န့ၣ်လီၤ. အဝဲတ ဘၣ်ဒိဒိၣ်ဒိၣ်မုၢ်မုၢ်ဘၣ် ဘၣ်ဆၣ်အခီၣ်ညိးထီၣ်န့ၣ်လီၤ. စီၤအ--- အံၤဒိးကူစါယါဘျါအသးဖဲ ယ--- သဝီအတၢ်ဟ့ၣ်ကသံၣ်ဒၢး (လၢအဘၣ်တၢ်တီခိၣ်ရိၣ်မဲအီၤလၢ ကညီဆူၣ်ချ့မၤစၢၤဝဲၤကျိၤ KDHW) န့ၣ်လီၤ. (သဝီဖိသ့ၣ်တဖၣ်တသ့ၣ်ညါစ့ၢ်ကီးဝဲ လၢမ့ၣ်ပိၢ်အံၤမ့ၢ်ဘၣ်တၢ်ဒိးလီၤ အီၤလၢသုးဖီၣ်စုကဝဲၤဖဲလဲၣ်တဖုလဲၣ်န့ၣ်ဘၣ်လီၤ.)

ဖဲတၢ်ကဲထီၣ်သးဝံၤအလီၢ်ခံအဝဲဟဲက့ၤလၢဟံၣ်ဆၢကတီၢ်ထံၣ်ကဒီးဝဲဟီၣ်လာ်မ့ၣ်ပိၢ်ခံဖျၢၣ်လၢဘၣ်တၢ်ဒိးလီၤပာ်အီၤဖဲဟီၣ်ကဝီၤဖဲန့ၣ်ဒီးတဘျီဃီဟ့ၣ်ပလီၢ်ဝဲသဝီဖိအဂၤသ့ၣ်တဖၣ် န့ၣ်လီၤ. သနာ်က့, ဖဲလါအီးကထိဘၢၣ် ၂၆ သီ, ၂၀၂၃ နံၣ်န့ၣ်, သဝီဖိ လၢအဂၤတဂၤလဲၤမိၤက့ၤအကျီၢ်လၢကျဲတဘိဃီဖဲန့ၣ်ဒီးဖဲလၢအဟဲက့ၤဆၢကတီၢ်အကျီၢ်တဒုယီၢ်ဘၣ်ဟီၣ်လာ်မ့ၣ်ပိၢ်ဒီးအခီၣ် တူာ်ကွံာ်န့ၣ်လီၤ. မ့မ့ၢ်သဝီဖိတဂၤန့ၣ်တခီတဘၣ်ဒိဘၣ်ထံးနီတမံၤဘၣ်.

လါဒံၣ်စဲဘၢၣ် ၁၅ သီ, ၂၀၂၃ နံၣ် - ဟီၣ်လာ်မ့ၣ်ပိၢ် ပိၢ်ဖးထီၣ်ဖဲ စ--- သဝီ, ပီချိဟီၣ်ကဝီၤ

ဖဲလါဒံၣ်စဲဘၢၣ် ၁၅ သီ, ၂၀၂၃ နံၣ်န့ၣ်, သဝီဖိလၢတၢ်တသ့ၣ်ညါအမံၤဒီးအသးနံၣ်ဘၣ်တဂၤ လၢအအိၣ်လၢ စ--- သဝီ, ပီချိ ဟီၣ်ကဝီၤ, ကစၢၢ်ဒိၣ်ကီၢ်ဆၣ်, ယီၢ်ဘၣ်ဟီၣ်လာ်မ့ၣ်ပိၢ်တဖျၢၣ် လၢအဘၣ်တၢ်ဒိးလီၤအီၤဖဲကျဲကပၤလၢအဘူးဒီး စ--- သဝီဖဲ အဝဲလဲၤလၢခုးပူၤဝံၤဟဲက့ၤလၢကျဲဒီးဒဲးအီၣ်တၢ်ဒိးအဆၢကတီၢ်န့ၣ်လီၤ. မ့ၢ်လၢအယီၢ်ဘၣ်ဟီၣ်လာ်မ့ၣ်ပိၢ်အံၤအဃိအခီၣ်လၢအ စ့ၣ်တပၤတူာ်ကွံာ်န့ၣ်လီၤ.  လၢတၢ်ကဲထီၣ်သးတခါအံၤအဖီခိၣ်, သဝီဖိအဂၤတဖၣ်လဲၤဆှၢအီၤဆူတၢ်ဆါဟံၣ်တဖျၢၣ်လၢအ အိၣ်လၢ ဒဝဲၢ်ဝ့ၢ် (လၢအဘၣ်တၢ်တီခိၣ်ရိၣ်မဲအီၤလၢ SAC) လၢကဒိးကူစါယါဘျါအသးအဂီၢ်န့ၣ်လီၤ.

တၢ်ကတိၤကျၢၢ်တံၢ်

လၢပီချိဟီၣ်ကဝီၤအပူၤ လီၤဆီဒၣ်တၢ်သဝီဖိလၢအအိၣ်လၢ ဒ---, စ---, ဟ---, ယ---, ထ---, ရှ--- ဒီး ဆ--- သဝီသ့ၣ် တဖၣ်အံၤ ဘၣ်ကွၢ်ဆၢၣ်မဲာ်ဒီးတၢ်လီၤဘၣ်ယိၣ်လၢအမ့ၢ်ဟီၣ်လာ်မ့ၣ်ပိၢ်သ့ၣ်တဖၣ်န့ၣ်လီၤ. ဒီးသဝီဖိကဒဲကဒဲဟ့ၣ်ကူၣ်ဟ့ၣ် ဖးလိာ်အသးလၢကဟးဆှဲးဝဲဟီၣ်ကဝီၤလၢအဝဲသ့ၣ်သ့ၣ်ညါပာ်လၢဟီၣ်လာ်မ့ၣ်ပိၢ်အိၣ်အလီၢ်န့ၣ်လီၤ. လၢတၢ်တသ့တဘၣ်အ ပူၤအဝဲသ့ၣ်မ့ၢ်ဘၣ်သူဝဲကျဲဖဲန့ၣ်လၢအတၢ်လဲၤတၢ်က့ၤအဂီၢ်တခီကသူဝဲကျဲဟးဆှဲး(ဖြတ်လမ်း) လၢအပူၤဖျဲးလၢအဝဲသ့ၣ်အ ဂီၢ်တသ့ဖဲအသ့န့ၣ်လီၤ.

ဟီၣ်လာ်မ့ၣ်ပိၢ်အတၢ်လီၤပျံၤလီၤဖုး ဒီး တၢ်လီၤဘၣ်ယိၣ်အံၤဒုးကဲထီၣ်ဝဲသဝီဖိသ့ၣ်တဖၣ်အတၢ်တံာ်မုၢ်တံာ်တာ်လၢအမုၢ်ဆ့ၣ် မုၢ်ဂီၤတၢ်ဖံးတၢ်မၤပူၤ, ဒီးကဲထီၣ်ဝဲတၢ်ကီတၢ်ခဲလၢအဝဲသ့ၣ်တၢ်လုၢ်အီၣ်နီၢ်ခိသးသမူအပူၤန့ၣ်လီၤ. လၢန့ၣ်အမဲာ်ညါ, ကီၢ်သူလ့ၤ သုးမုၢ်ဒိၣ် (KTLA) ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးတၢ်ဟူးတၢ်ဂဲၤအါထီၣ်လၢပီချိဟီၣ်ကဝီၤပူၤအဃိကဲ ထီၣ်စ့ၢ်ကီးတၢ်တံာ်တာ်လၢသဝီဖိသ့ၣ်တဖၣ်တၢ်လုၢ်အီၣ်နီၢ်ခိသးသမူအဂီၢ်န့ၣ်လီၤ.