SAC ကဘီယူၤဒုးသုးခးလီၤတၢ်ဖဲ ထံသးစီကရူၢ်
ဖဲလါစဲးပထ့ဘၢၣ် ၁၀သီ, ၂၀၂၃ နံၣ် ဟါခီ ၁၂:၂၀ အဆၢကတီၢ် ထံကီၢ်တၢ်ပၢတၢ်ပြးကီၣ်ကးကရၢ (SAC) ကဘီယူၤဒုးသုး တဘ့ၣ် ဟဲယူၤဝ့ၤဝီၤဖဲ အ--- သဝီ, ထံသးစီကရူၢ်, ဒီၣ်ဖးခိၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ. တၢ်ကဲထီၣ်သးတၢတဘျီအဆၢ ကတီၢ် SAC ကဘီယူၤဒုးသုးတဘ့ၣ်န့ၣ် တ့ၢ်လီၤကျိဖးဒိၣ်ချံတဖၣ်ဒီး လီၤတဲာ်လၢ တၢ်လူၢ်လၢအအိၣ်ဖဲ သဝီမုၢ်ထီၣ်တကပၤ န့ၣ်လီၤ. ကျိဖးဒိၣ်ချံတဖျၢၣ် လီၤတဲာ်ဘၣ်တၢ်ဘါယွၤသရိာ်အိၣ်လၢ တၢ်လူၢ်ခိၣ်အဃိ ဒၢလွဲအခိၣ်ဒုးဒီး မဲာ်ကလၤခံဘ့ၣ်သ့ၣ်ဖး ဝဲန့ၣ်လီၤ.
မုၢ်နံၤဝဲန့ၣ်လီၢ်ခံ SAC သုးကဘီယူၤ (ဟၢၤလံၤခီၣ်ပတၢၣ်) တဘ့ၣ် ခးလီၤကျိဖးဒိၣ်ချံ ဃုာ်ဒီးကျိစဲး ခံဘျီတဘျီဖဲ တၢ်လူၢ်အဂၤတတီၤလၢအအိၣ်ဖဲ အ--- သဝီမုၢ်နုာ်တကပၤန့ၣ်လီၤ. ကဘီယူၤဟဲခးလီၤတၢ်တဘျီအံၤအဆၢကတီၢ် သဝီဖိဟံၣ် (၁၅) ဖျၢၣ်လၢအအိၣ်ဖဲတၢ်လူၢ်ခိၣ်ဟးဂီၤကွံာ်ဝဲန့ၣ်လီၤ. ကဘီယူၤခးလီၤတၢ်တဘျီအံၤ ဟးဂီၤအါထီၣ်စ့ၢ်ကီး တၢ်ဘါယွၤသရိာ် တၢ်ဒူၣ်ကပၤန့ၣ်လီၤ. ကၠိလၢအအိၣ်သူၣ်လီၤသးလၢသဝီပူၤတဖျၢၣ် အတၢ်ဒူၣ်ကပၤဟးဂီၤစ့ၢ်ကီးန့ၣ်လီၤ. ဟံၣ် (၁၅)ဖျၢၣ်အကျါ ဟံၣ်တဖျၢၣ်န့ၣ် ကျိဖးဒိၣ်ချံလီၤတဲာ်ဘၣ်အီၤဒီးဘၣ်ဒီးကျိစဲးချံန့ၣ်လီၤ. သဝီဖိယဲၢ်ဂၤလၢအမ့ၢ်ပိာ်မုၣ်တဂၤလၢအမံၤမ့ၢ် နီၢ်ဟ--- ဒီး အဖိသၢဂၤ ဒီး အဖိဒိၣ်ခွါတဖၣ် အအိၣ်လၢဟံၣ်တဖျၢၣ်န့ၣ်အပူၤ ဘၣ်ဒိဘၣ်ထံးဒီးဘၣ်သံဘၣ်ပှၢ် ခီဖျိကဘီယူၤ ဟဲခးလီၤ တၢ်အဃိန့ၣ်လီၤ. [ဖဲန့ၣ်အဆၢကတီၢ်နီၢ်ဟ--- အဝၤန့ၣ်တအိၣ်လၢဟံၣ်ဘၣ်]. ခီဖျိလၢ ကဘီယူၤခးလီၤတၢ်အဃိ စီၤဘ--- လၢ (ဖိဒိၣ်ခွါ) အသးနံၣ်အိၣ် ၁၂ နံၣ်န့ၣ် ကျိဖးဒိၣ်အက့အခီဘၣ်အခိၣ်လီၢ်ခံဒီး သံတဘျီဃီန့ၣ်လီၤ. ဟံၣ်ဖိဃီဖိ အဂၤလွံၢ်ဂၤ ဘၣ်ဒိနးနးကလဲာ်န့ၣ်လီၤ. နီၢ်ဟ---- (သးနံၣ်အိၣ် ၄၅ နံၣ်) န့ၣ်ဘၣ်တၢ်လဲၤဆှၢအီၤဆူ တၢ်ဆါဟံၣ်တဖျၢၣ် ဒီး [မ့ၢ်လၢအဘၣ် ဒိနးဒိၣ်မးအဃိ] လၢခံသံဝဲန့ၣ်လီၤ. ဖိသၣ်အဂၤသၢဂၤန့ၣ် မ့ၢ်ဝဲ စီၤစ--- (သးနံၣ်အိၣ် ၁၄ နံၣ်), စီၤဒ--- (သးနံၣ်အိၣ် ၉ နံၣ်), ဒီး နီၢ်င--- (သးနံၣ်အိၣ် ၁၂ နံၣ်) န့ၣ်လီၤ. စီၤစ--- အဟၢဖၢဘၣ်ဒိ, စီၤဒ--- အခီၣ်ဘၣ်ဒိ, ဒီး နီၢ်င--- အဖံဘၣ်ခိၣ်ဘၣ်ဒိဝဲန့ၣ်လီၤ. ဟံၣ်ဖိဃီဖိတဒူၣ်အံၤ အဟံၣ်ခိၣ်ဒုးလၢဘၣ်တၢ်တ့ထီၣ်အီၤဒီးထးဘ့ၣ်ဝါ, ဒီး ဟံၣ်ဒူၣ်လၢသ့ၣ်န့ၣ် ဟးဂီၤဝဲဒိၣ်ဒိၣ်မုၢ်မုၢ်ဒီး ဟံၣ်ဖိဃီဖိတဖၣ်အိၣ်လၢ ဟံၣ်ဝဲန့ၣ်အပူၤတသ့လၢၤဘၣ်န့ၣ်လီၤ. ခီဖျိကဘီယူၤဟဲခးလီၤတၢ်အံၤအဃိ လီၢ်ကဝီၤသဝီဖိတဂၤ လၢအအိၣ် ဖဲအ--- သဝီ အသဲးထူၣ်တဖၣ်, ဖၤလၤ (မးအံး) ထူၣ်တဖၣ် ဒီး ဃီၤထူၣ်တဖၣ် ဟးဂီၤစ့ၢ်ကီးန့ၣ်လီၤ.
လၢတၢ်ဘံၣ်တၢ်ဘၢအဂီၢ် လီၢ်ကဝီၤသဝီဖိတဖၣ် ဃ့ၢ်အိၣ်လၢပှၢ်ပူၤဒီး တၢ်သူၣ်တၢ်ဖျးလီၢ်န့ၣ်လီၤ. ဖဲ SAC ကဘီယူၤဟဲခးလီၤတၢ်အဆၢကတီၢ်ပှၤလၢအသးပှၢ်တနီၤဃ့ၢ်အိၣ်တကဲဘၣ်အဃိ အိၣ်လၢအဝဲသ့ၣ်အဟံၣ်ပူၤန့ၣ်လီၤ. ခီဖျိလၢကဘီယူၤဟဲခးလီၤ တၢ်အဃိ ဖိသၣ်တဖၣ်ဘၣ်ဃ့ၢ်အိၣ်ဒီးအဝဲသ့ၣ်မိပါတဖၣ်လၢ တၢ်လီၢ်လၢအဘံၣ်အဘၢအဃိ ထီၣ်ကၠိတသ့လၢာ်ဘၣ်န့ၣ်လီၤ. သဝီဖိလၢဃ့ၢ်မှံဟးဖျိးတဖၣ် ခံနွံအလီၢ်ခံဟဲက့ၤလၢ အဝဲသ့ၣ်သဝီန့ၣ်လီၤ. ဖိသၣ်တနီၤလၢအဟဲက့ၤလၢသဝီပူၤတဖၣ် လဲၤထီၣ်က့ၤကၠိသနာ်က့ဖိသၣ်တနီၤပျံၤလၢကဘီယူၤကခးလီၤတၢ်ဒီးတၢ်ခးလီၤနါစိၤကျိးဖးဒိၣ်ချံကကဲထီၣ်သးဆူညါကဒီးန့ၣ်လီၤ. ဖဲသဝီဖိတဖၣ် ဃ့ၢ်မှံဟးဖျိးလၢ ပှၢ်ပူၤအဆၢကတီၢ် သဝီဖိတနီၤ ဘၣ်တၢ်ခုၣ်ဒီးအိၣ်တဆူၣ်ဘၣ်န့ၣ်လီၤ. ဖဲ SAC ကဘီယူၤဟဲခးလီၤတၢ်အဆၢကတီၢ် ကမျၢၢ်တၢ်ဒီသဒၢသုး (PDF) တနီၤအိၣ်လၢ အ--- သဝီပူၤန့ၣ်လီၤ. PDF တဖၣ်အံၤနုာ်လီၤအိၣ်လၢသဝီပူၤ ဖဲတၢ်ဒုးကဲထီၣ်လၢအဘူးဒီး ယၤဒိသဝီ, ထံသးစီကရူၢ်ဝံၤအလီၢ်ခံန့ၣ်လီၤ. တၢ်ဒုးတကဲထီၣ်သးလၢအ---သဝီပူၤဘၣ်သနာ်က့ SAC ကဘီယူၤခးလီၤတၢ်လၢသဝီဝဲအံၤန့ၣ်လီၤ. သဝီဖိလၢအဃ့ၢ်အိၣ်ကမှံတဖၣ် ဟဲက့ၤအိၣ်လၢအဝဲသ့ၣ် သဝီပူၤလံဘၣ်ဆၣ် အဝဲသ့ၣ်ပျံၤဒံးလၢ SAC ကခးလီၤကျိဖးဒိၣ်ချံတဖၣ်ဒီး ကဘီယူၤကခးလီၤတၢ်လၢအဝဲသ့ၣ်သဝီအသီ တဘျီန့ၣ်လီၤ. သဝီဖိတဖၣ်ဃ့ထီၣ်ဝဲလၢ SAC ကပတုၤခးတၢ်လၢအဝဲသ့ၣ်သဝီပူၤအဂီၢ်န့ၣ်လီၤ.