Fri, 22 Mar 2024
တၢ်ကဲထီၣ်သးတၢ်ပာ်ဖျါတဘ့ၣ်အံၤပာ်ဖျါထီၣ်ဝဲတၢ်ကဲထီၣ်သးဖဲ ကစၢၢ်ဒိၣ်ကီၢ်ဆၣ်, ဘျံး-ဒဝဲၢ်ကီၢ်ရ့ၣ် ဖဲလါအီးကထိဘၢၣ် ၂၀၂၃ နံၣ် န့ၣ်လီၤ. ဖဲ လါအီးကထိဘၢၣ် ၂၅သီ န့ၣ် ထံကီၢ်တၢ်ပၢတၢ်ပြးကီၣ်ကးကရၢ SAC ခီၣ်သုးရ့ၣ် ခလရ-၄၀၃ ဖီၣ်န့ၢ် ဆူၣ်ပှၤသဝီဖိပိာ်ခွါ ၃၁နံၣ် တဂၤလၢအမံၤမ့ၢ် ကိၤအ---ဖဲအဝဲသ့ၣ်လဲၤခီဂာ်ဘၣ်အသဝီ, ကစၢၢ်ချၢဟီၣ်ကဝီၤ, ကစၢၢ်ဒိၣ်ကီၢ်ဆၣ် ဖဲအဝဲသ့ၣ်ထိသုးကျိၤအဆၢကတီၢ်န့ၣ်လီၤ. ဘၣ်မနုၤဃိလၢ ကိၤအ---ဘၣ်တၢ်ဖီၣ်အီၤလဲၣ်အဂ့ၢ်န့ၣ်ပှၤတ သ့ၣ်ညါဘၣ်နီတဂၤ ဘၣ်. လီၢ်ခံကတၢၢ်သဝီဖိတဖၣ်ထံၣ်န့ၢ်က့ၤအစိၣ်လၢဘၣ်တၢ်ခူၣ်လီၤဘၢအီၤလၢတၢ်ပူၤဒီၣ်ကိာ်ဖိဖဲသဝီလၢ အဘူးတဖျၢၣ်အပူၤ န့ၣ်လီၤ. လၢတၢ်ကဲထီၣ်သးတခါအံၤအဃိသဝီဖိတဖၣ်ပျံၤတၢ်ဖုးတၢ်ဒီး အိၣ်ဘၣ်ဝဲတဘံၣ်တဘၢလၢအဝဲ သ့ၣ်ဂီၢ်ဘၣ်. သဝီဖိတနီၤလဲၤဃ့ၢ်အိၣ်ဆူသဝီလၢအဘူး ဒီး တနီၤလဲၤဃ့ၢ်အိၣ်ဆူခူပူၤဝ့ၢ်ပူၤလၢအနီၢ်ကစၢ်တၢ်ပူၤဖျဲးအဂီၢ်န့ၣ် လီၤ.
Mon, 11 Mar 2024
တၢ်ကဲထီၣ်သးတၢ်ပာ်ဖျါတဘ့ၣ်အံၤပာ်ဖျါထီၣ်ဝဲတၢ်ကဲထီၣ်သးဖဲ မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ် ဖဲလါအီးကထိဘၢၣ် ၂သီ, ၂၀၂၃နံၣ် န့ၣ်လီၤ. ပှၤသဝီဖိခံဂၤလၢအမံၤမ့ၢ် စီၤဘ--- (သးနံၣ် ၄၆နံၣ်) ဒီး နီၢ်ည--- (သးနံၣ် ၉နံၣ်) ဘၣ်ဒိခီဖျိ ထံကီၢ်တၢ်ပၢ တၢ်ပြးကီၣ်ကးကရၢ (SAC) ခီၣ်ချ့သုးရ့ၣ် နီၣ်ဂံၢ်- (ခမရ-၃၀၇) အတၢ်ခးလီၤနါစိၤကျိဖးဒိၣ်ဆူ စ--- သဝီအဃိန့ၣ်လီၤ. ကျိဖးဒိၣ်ပိၢ်ဖးထီၣ်အဃိ စီၤဘ--- ဘၣ် ဒိဖဲအချၢဃံဒီးမ့မ့ၢ်နီၢ်ည---တခီအစုမုၢ်တူာ်ကွံာ်သၢဘိန့ၣ်လီၤ. အဝဲသ့ၣ်ခံဂၤလၢာ်ဒိးကူ ဆါယါဘျါအသးလၢလီၢ်ကဝီၤဆူၣ်ချ့ပှၤမၤတၢ်ဖိတဖၣ်အစုပူၤ ဖဲတၢ်ဆါဟံၣ်လၢအအိၣ်ဖဲသဝီလၢအဘူးတဖျၢၣ်အပူၤန့ၣ်လီၤ. ခီဖျိလၢ SAC ခးလီၤကျိဖးဒိၣ်အဃိ ဘၣ်ဒိစ့ၢ်ကီးကျီၢ်ခံဒုန့ၣ်လီၤ.
Thu, 07 Mar 2024
တၢ်ကဲထီၣ်သးတၢ်ပာ်ဖျါတဘ့ၣ်အံၤပာ်ဖျါထီၣ်ဝဲ တၢ်ကဲထီၣ်သးလၢ ဘုသိၣ်ကီၢ်ဆၣ်, မုၢ်တြီၢ်ကီၢ်ရ့ၣ် ဖဲလါစဲးပထ့ဘၢၣ် ၂၀၂၃ နံၣ် အတီၢ်ပူၤန့ၣ်လီၤ. ဖဲလါစဲးပထ့ဘၢၣ် ၂သီ, ၂၀၂၃ နံၣ် ဟါခီ (၂း၃၀) အဆၢကတီၢ်ဃၣ်ဃၣ်န့ၣ် ထံကီၢ်တၢ်ပၢတၢ်ပြးကီၣ် ကးကရၢ (SAC) သုးဖိတဖၣ်ခး င--- လၢအသးနံၣ်အိၣ် (၅၁) နံၣ် အအိၣ်ဖဲ က--- သဝီ, မဲၢ်ကျီကရူၢ်, ဘုသိၣ်ကီၢ်ဆၣ်န့ၣ်လီၤ. SAC သုးဖိတဖၣ်ခးအီၤဖဲ အလဲၤဟံက့ၤအကျီၢ်အိၣ်ဖဲတၢ်ပျီလၢအအိၣ် ဝ့ၤစၤသဝီပူၤ ဟဲက့ၤအဆၢကတီၢ်န့ၣ်လီၤ. မ့ၢ်လၢအဘၣ် ဒိအဃိ အဘၣ်ထီၣ်တၢ်ဆါဟံၣ် (၂၃) သီန့ၣ်လီၤ. မ့ၢ်လၢ SAC သုးဖိတဖၣ် ခးလီၤကျိဖးဒိၣ်လၢသဝီဖိတဖၣ် စံာ်လီၢ်ခုးလီၢ်ဖဲ လီၢ်ကဝီၤသုးဖီၣ်စုကဝီၤတဖၣ် လဲၤခးအဝဲသ့ၣ်ဝံၤအဆၢကတီၢ်အဃိ လီၢ်ကဝီၤသဝီဖိတဖၣ်ပျံၤလၢ ကလဲၤမၤတၢ်လၢ အဝဲသ့ၣ်စံာ်လီၢ်ခုးလီၢ်န့ၣ်လီၤ. သဝီဖိတဖၣ် ကမၤတၢ်လၢတၢ်ဘံၣ်တၢ်ဘၢအပူၤဒီး ကလုၢ်အီၣ်နီၢ်ခိသးသမူအဂီၢ် အဝဲသ့ၣ် တဘၣ်သးလၢ SAC သုးဖိတဖၣ် ကဟူးကဂဲၤလၢ အဝဲသ့ၣ် ဟီၣ်ကဝီၤဘၣ်န့ၣ်လီၤ.
Tue, 05 Mar 2024
တၢ်ပာ်ဖျါအဖုၣ်တဘ့ၣ်အံၤပာ်ဖျါဝဲ တၢ်ကဲထီၣ်သးဖဲ ထီတထူၣ်ကီၢ်ဆၣ်, တီအူကီၢ်ရ့ၣ်ပူၤ ဖဲ လါစဲးပထ့ဘၢၣ် တုၤ လါနိၣ်ဝ့ ဘၢၣ်, ၂၀၂၃နံၣ် အဘၢၣ်စၢၤ, ပၣ်ဃုာ်ဒီး တၢ်ဒွဲၣ်အူဟံၣ်ဃီ, တၢ်ခးလီၤနါစိၤကျိဖးဒိၣ် ဒီးကဘီယူၤဟဲခးလီၤတၢ်တဖၣ်န့ၣ်လီၤ. ဖဲ လါစဲးပထ့ဘၢၣ် ၂၀၂၃နံၣ်န့ၣ်, တၢ်ဖ့ၣ်ဆၢဟဲဆူၣ်ထီၣ်ဝဲဒၣ်လၢ ထံကီၢ်တၢ်ပၢတၢ်ပြးကီၣ်ကးကရၢ SAC ဒီး လီၢ်ကဝီၤပှၤဖီၣ်စုက ဝဲၤပၢၢ်ဆၢတၢ်တဖၣ်အဘၢၣ်စၢၤ ဖဲဒ့လိမုၢ်နုာ်ကရူၢ်, ထီတထူၣ်ကီၢ်ဆၣ်, ဖဲလၢ ကမျၢၢ်တၢ်ဒီသဒၢသုး (PDF) ဒီး ကညီတၢ်ထူၣ်ဖျဲး သုးမုၢ်ဒိၣ် (KNLA) မၤသံဝဲဒၣ်ပယီၤသုးအတၢ်မဲာ်ချံလၢတၢ်ဟဲဆှၢအီၤလၢလီၢ်ကဝီၤအံၤအပူၤအခါန့ၣ်လီၤ. ဖဲတၢ်မၤသံအီၤဝံၤအ လီၢ်ခံ, SAC သုးဒွဲၣ်အူဝဲ သဝီဖိတဖၣ်အဟံၣ်အစှၤကတၢၢ်၂၇ဖျၢၣ် လၢသဝီယဲၢ်ဖျၢၣ်အပူၤ, ခးလီၤနါ စိၤကျိဖးဒိၣ်ဆူသဝီတဖၣ် အပူၤ, ဒီးဟဲခးလီၤတၢ်လၢကဘီယူၤ, ဒီးဘၣ်ဒိဘၣ်ထံးဝဲဒၣ်သဝီဖိ ၃ဂၤ န့ၣ်လီၤ. တၢ်ခးလီၤကျိဖးဒိၣ် အဃိဘၣ်ဒိဝဲသဝီဖိတဂၤ, သဝီဖိဟံၣ်ဟးဂီၤဝဲဒၣ် ၅ဖျၢၣ်, ဒီးကျးဟးဂီၤဝဲဒၣ်တဖျၢၣ်, တကးဒံးဘၣ် တၢ်သူၣ်တၢ်ဖျးဟးဂီၤ ဒီး ကျီၢ်သံဝဲဒၣ်တဒုန့ၣ်လီၤ. ကဘီယူၤဟဲခးလီၤတၢ်အဃိ သဝီဖိဘၣ်ဒိ ၂ဂၤ, ဒီး သဝီဖိအဟံၣ်ဟးဂီၤဝဲဒၣ်တဖျၢၣ်န့ၣ်လီၤ.
Wed, 28 Feb 2024
တၢ်ကဲထီၣ်သးတၢ်ပာ်ဖျါတဘ့ၣ်အံၤပာ်ဖျါထီၣ်ဝဲတၢ်ကဲထီၣ်သး ဖဲနိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. ဖဲလါနိၣ်ဝ့ ဘၢၣ် ၂သီ, ၂၀၂၃နံၣ်န့ၣ် ထံကီၢ်တၢ်ပၢတၢ်ပြးကီၣ်ကးကရၢ SAC သုးဖိတဖၣ် ခးလီၤနါစိၤကျိဖးဒိၣ်ဆူ က---သဝီ, နိၣ်တကီက ရူၢ်, နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. ကျိဖးဒိၣ်ချံတဖျၢၣ်လီၤတဲာ်ပိၢ်ဖးထီၣ်လၢသဝီဖိတဂၤအဟံၣ်ကပၤ ဒီးဘၣ် ဒိဝဲ စီၤဘ---, လၢအသးနံၣ်အိၣ် ၂၀နံၣ် တဂၤန့ၣ်လီၤ. စီၤဘ---အံၤလဲၤကူဆါယါဘျါဝဲအသးလၢ ဃိၣ်သၢဆံ တၢ်ဆါဟံၣ်, ဃိၣ် သၢဆံကရူၢ်, ကီတရံးကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. ခီဖျိလၢတၢ်ဒုးတၢ်ယၤကဲထီၣ်လၢလီၢ်ကဝီပူၤအဃိ, သဝီဖိသ့ၣ်တ ဖၣ်ဘၣ်ဃ့ၢ်မှံဟးဖျိး ဒီးကၠိဘၣ်တၢ်ကးတံာ်ကွံာ်အီၤန့ၣ်လီၤ.
Mon, 26 Feb 2024
တၢ်ပာ်ဖျါအဖုၣ်တဘ့ၣ်အံၤ ပာ်ဖျါဝဲ  တၢ်ကဲထီၣ်အသးလၢ ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ် ဖဲလါနိၣ်ဝ့ဘၢၣ် ၂၀၂၃ နံၣ်န့ၣ် လီၤ. ဖဲလါနိၣ်ဝ့ဘၢၣ် ၂ သီ, ၂၀၂၃ နံၣ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးပာ်ဖှိၣ်တဖၣ်ဒီး ကီၢ်သူလ့ၤသုးမုၢ် ဒိၣ် (KTLA) လဲၤထီၣ်ခး ထံကီၢ်တၢ်ပၢတၢ်ပြးကီၣ်ကးကရၢ (SAC) ခီၣ်သုးရ့ၣ် (IB) နီၣ်ဂံၢ် (၃၂) သုးကလၢၤလၢ အအိၣ်ဘူးဒီး က--- သဝီ, မီခံကရူၢ်, ကီးတရံးကီၢ်ဆၣ်ဒီး ဒြိဒီး တၢ်ခးလိာ်သးကဲထီၣ်ဝဲန့ၣ်လီၤ. တၢ်ခးလီၤသးကဲထီၣ်ဝံၤ SAC သုးတဖၣ်ခးလီၤကျိဖးဒိၣ်ချံအါအါဂီၢ်ဂီၢ်လၢ က--- သဝီဒီး သဝီဖိတဖၣ်အတၢ်သူၣ်တၢ်ဖျးလီၢ်ဒီတနံၤကျၢၤန့ၣ်လီၤ. လၢတၢ်န့ၣ်အဃိသဝီဖိအိၣ်ဖဲ က--- သဝီတဖၣ် ပျံၤတၢ်ဒီး လဲၤဃ့ၢ်လၢ ခ--- ဟီၣ်ကဝီၤလၢ အမ့ၢ် ထံလီၢ်ကီၢ်ပူၤပှၤဃ့ၢ်အိၣ်ကမှံ(IDP)အိၣ်တၢ်လီၢ်န့ၣ်လီၤ. လၢန့ၣ်အမဲာ်ညါ SAC ခးလီၤကျိဖးဒိၣ်ချံလၢ က--- သဝီပူၤ အဃိ သဝီအခိၣ်အဃၢၤ သဝီဖိတဖၣ် ပျံၤတၢ်လၢကအိၣ်က ဆိးဒီး မၤတၢ်လၢသဝီပူၤန့ၣ်လီၤ.
Thu, 15 Feb 2024
တၢ်ကဲထီၣ်သးတၢ်ပာ်ဖျါတဘ့ၣ်အံၤပာ်ဖျါထီၣ်ဝဲ တၢ်ကဲထီၣ်သးလၢ ဒီၣ်ဖးခိၣ်ကီၢ်ဆၣ်, တီအူကီၢ်ရ့ၣ် ဖဲလါအီကူး ၂၀၂၃ နံၣ် အတီၢ်ပူၤန့ၣ်လီၤ. ဖဲလါအီကူး ၂၂ သီ, ၂၀၂၃ နံၣ်န့ၣ် ထံကီၢ်တၢ်ပၢတၢ်ပြးကီၣ်ကးကရၢ (SAC) ခးလီၤနါစိၤကျိဖးဒိၣ်ချံသၢဖျၢၣ်လၢ သၤတီၤကၠံဝ့ၢ်, ဒီၣ်ဖးခိၣ်ကီၢ်ဆၣ်ပူၤန့ၣ်လီၤ. တၢ်ခးလီၤနါစိၤကျိဖးဒိၣ်ချံအံၤအဃိ သဝီဖိသၢဂၤအဟံၣ်ဟးဂီၤဝဲဒီး ကျဲ လၢသဝီဖိသူတဘိစ့ၢ်ကီး ဟးဂီၤကွံာ်ဝဲဒၣ်န့ၣ်လီၤ. ဖဲလါအီကူး ၂၆ သီ, ၂၀၂၃ နံၣ်န့ၣ် SAC သုးဖိလၢ ခီၣ်ချ့သုးရ့ၣ် (LIB) နီၣ် ဂံၢ် (၃၀၄) ခးလီၤနါစိၤ (၁၂၀) မမ ကျိဖးဒိၣ်ချံသၢဖျၢၣ်လၢ အ--- သဝီ, ဒီၣ်ဖးခိၣ်ကီၢ်ဆၣ်န့ၣ်လီၤ. တၢ်ခးလီၤကျိဖးချံအံၤအဃိ သဝီဖိပိာ်မုၣ်လၢအမံၤမ့ၢ် မၣ်စ--- ဘၣ်ဒိဝဲနးနးကလဲာ်န့ၣ်လီၤ. အဝဲဒိးကူစါယါဘျါသးလၢတၢ်ဆါဟံၣ်တဖျၢၣ်ဘၣ်ဆၣ် ခီဖျိလၢ အဘၣ်ဒိနးဒိၣ်မးအဃိ လၢခံသံဝဲဒၣ်န့ၣ်လီၤ.

ပမၤလိၦၤတဝၢဖိတဖၣ် လၢကမၤနီၣ်မၤဃါ တၢ်မၤဘၣ်ဒိၦၤဂ့ၢ်ဝီခွဲးယာ်လၢပျီပူၤဒီး ဘၣ်တၢ်ကျိာ်ထံက့ၤအီၤဒီး  ရၤလီၤအီၤ လၢပလံာ်တၢ်ကစီၣ်အပူၤ  ဒ်သိးပကဒုးသ့ၣ်ညါၦၤဂၤလၢ သဝီဖိတဖၣ်အတၢ်ထံၣ်အတၢ်ပာ်သး အဂီၢ်န့ၣ်လီၤ.

ပမၤသကိးတၢ်ဒီး  လီၢ်ကဝီၤဒီးဟီၣ်ခိၣ်ဒီဘ့ၣ် ၦၤလၢအမၤတၢ်ဆၢတဲာ်သ့ဘၣ်ဃးဒီး  ၦၤဟီၣ်ခိၣ်ဖိခွဲးယာ်သ့ၣ်တဖၣ်   ဒီးမၤလီၤတံၢ်အီၤ ဒ်သိးၦၤသဝီဖိတဖၣ်အကလုၢ်ကတုၤဆူ  ၦၤလၢအမၤတၢ်ဆၢတဲာ်လၢ အလုၢ်ဘၢအဝဲသ့ၣ်အတၢ်အိၣ်မူ သ့သ့ၣ်တဖၣ် အအိၣ်အဂီၢ်န့ၣ်လီၤ.

ပဟ့ၣ်တၢ်သိၣ်လိဘၣ်ဃး ၦၤဂ့ၢ်ဝီခွဲးယာ် ဟီၣ်ခိၣ်ဒီဘ့ၣ်တၢ်တိစၢၤမၤစၢၤၦၤဂ့ၢ်ဝီတၢ်လိၣ်ဘၣ်သဲစးတၢ်ဘျၢ (IHL) အဂ့ၢ် ဆူလီၢ်ကဝီၤဂံၢ်ခီၣ်ထံးတၢ်ကရၢကရိဒီးသုးဖီၣ်စုကဝဲၤကရၢတဖၣ် လၢတၢ်ဆီၣ်ထွဲမၤစၢၤအဝဲသ့ၣ် လၢ ခါဆူညါအတၢ်ဒီ သဒၢဒီးမၤနီၣ်မၤဃါတၢ်မၤပယွဲၦၤဂ့ၢ်ဝီခွဲးယာ်အဂီၢ်န့ၣ်လီၤ.

ပတၢ်ကူၣ်လိာ်တၢၣ်ပီၣ်တဲသကိးတၢ်မၤလိလၢၦၤတဝၢအပတီၢ်တဖၣ် ဟ့ၣ်ၦၤသဝီဖိတဖၣ်တၢ်လီၢ်လၢ ကဟ့ၣ်ခီဟ့ၣ်နီၤ လီၤအတၢ်လဲၤခီ ဖျိတဖၣ်ႇ ဒိးန့ၢ်ဘၣ်တၢ်သ့ၣ်ညါနၢ်ပၢၢ်ဒီး မၤလဲၤထီၣ်လဲၤထီအဝဲသ့ၣ် အနီၢ်ကစၢ်တၢ်ဒီသဒၢလီၤသး အကျိၤအကျဲတဖၣ်န့ၣ်လီၤ.

လံာ်ဘိးဘၣ်ရၤလီၤတဖၣ်

လံာ်ပာ်ဖျါလၢအဘၣ်ထွဲတၢ်ဂ့ၢ်မိၢ်ၦၢ်တဖၣ်ဒီး လံာ်တၢ်ပာ်ဖျါတၢ်ထံၣ်တဖၣ်

လံာ်တၢ်ကစီၣ်